സുരക്ഷിതമെന്ന് ഉറപ്പാക്കിയ ഏലത്തിന് മികച്ച വില ലഭ്യമാക്കാനും പ്രത്യേക ഇ-ലേലം ലക്ഷ്യമിടുന്നു

കൊച്ചി: ലാബ് പരിശോധനയിലൂടെ കീടനാശിനിയുടെയും കൃത്രിമ നിറങ്ങളുടെയും സാന്നിധ്യമില്ലെന്ന് ഉറപ്പാക്കിയ ഏലത്തിന്റെ പ്രത്യേക വിപണന മാര്‍ഗം സുഗമമാക്കുന്നതിന് പരീക്ഷണാടിസ്ഥാനത്തില്‍ പ്രത്യേക ഇ-ലേലം ആരംഭിക്കാന്‍ സ്‌പൈസസ് ബോര്‍ഡ് തീരുമാനിച്ചു. കയറ്റുമതി വിപണിയില്‍ മികച്ച ഗുണനിലവാരമുള്ള ഏലം ലഭ്യമാക്കുന്നതിനും കയറ്റുമതി സുഗമമാക്കുന്നതിനും ലാബ് പരിശോധനയിലൂടെ സുരക്ഷിതമെന്ന് ഉറപ്പാക്കിയ ഏലത്തിന് മികച്ച വില ലഭ്യമാക്കാനും പ്രത്യേക ഇ-ലേലം ലക്ഷ്യമിടുന്നു. ഏലത്തില്‍ GAP/IPM/ ജൈവ ഉത്പാദന രീതികള്‍ സ്വീകരിക്കാന്‍ കൂടുതല്‍ കര്‍ഷകരെ പ്രേരിപ്പിക്കാന്‍ ഈ ഉദ്യമം സഹായിക്കുമെന്നാണ് പ്രതീക്ഷിക്കുന്നത്.

ഏലത്തിന്റെ ആദ്യ പ്രത്യേക ഇ-ലേലം ബോര്‍ഡിന്റെ ഇടുക്കിയിലെ പുറ്റടിയിലുള്ള ഇ-ലേല കേന്ദ്രത്തില്‍ 2022 ഒക്ടോബര്‍ 22-ന് നടക്കും. ബോര്‍ഡ് നിര്‍ദ്ദേശിച്ച പ്രകാരം കീടനാശിനിയുടെയും കൃത്രിമ നിറങ്ങളുടെയും സാന്നിധ്യമില്ലെന്ന് പരിശോധിച്ച് ഉറപ്പാക്കിയ ഏലം മാത്രമേ പ്രത്യേക ഇ-ലേലത്തില്‍  അനുവദിക്കുകയുള്ളൂ.

നെല്ലിന്റെ സംഭരണവില കര്‍ഷകര്‍ക്ക് വേഗത്തില്‍ നല്‍കാനായി സപ്ലൈകോ ബാങ്കുകളുമായി കരാറില്‍ ഒപ്പിട്ടു... Read More

പരിശോധനയ്ക്ക് ശേഷം പ്രത്യേക ഇ-ലേലത്തിന് തെരഞ്ഞെടുക്കപ്പെടുന്ന കര്‍ഷകര്‍ക്ക് പ്രോത്സാഹനമായി, ടെസ്റ്റിംഗ് ചാര്‍ജിന്റെ 1/3 ഭാഗം വഹിക്കാന്‍ ബോര്‍ഡ് നിര്‍ദ്ദേശിക്കുന്നു. പ്രത്യേക ഇ-ലേലം നടത്താന്‍ സന്നദ്ധത പ്രകടിപ്പിച്ച നിലവിലുള്ള നാല് ലേലക്കാര്‍ക്ക് അതിനായി സ്ലോട്ടുകള്‍ നല്‍കും. പ്രത്യേക ഇ-ലേലം നടത്തുന്നതിനുള്ള നിബന്ധനകളും വ്യവസ്ഥകളും ലേലക്കാര്‍ക്ക് വിതരണം ചെയ്തിട്ടുണ്ട്. കൂടാതെ ബോര്‍ഡിന്റെ വെബ്സൈറ്റില്‍ http://www.indianspices.com/trade/trade-notifications/notificationdetails.html?id=331 വിവരങ്ങള്‍ ലഭ്യമാണ്.

ക്ലൗഡ് അധിഷ്ഠിത ലൈവ് ഇ-ലേല സൗകര്യം വഴി കേരളത്തിലെ പുറ്റടിയിലുള്ള ബോര്‍ഡിന്റെ ഇ-ലേല കേന്ദ്രത്തിലോ തമിഴ്നാട്ടിലെ ബോഡിനായകനുരിലോ പ്രത്യേക ഇ-ലേലത്തില്‍ പങ്കെടുക്കാം. പരീക്ഷണ ഘട്ടത്തില്‍ മാസത്തിലെ അവസാന ശനിയാഴ്ചകളില്‍ മാസത്തില്‍ ഒരു തവണ വീതം പ്രത്യേക ഇ-ലേലം നടത്താന്‍ ബോര്‍ഡ് ലക്ഷ്യമിടുന്നു.